Hesperian Health Guides
Paano magpasuso
Mga nilalaman
Para sa bagong silang na sanggol
Gustong sumupsop ng mga sanggol kung sila’y gutom, uhaw, may nilalabanang sakit, mabilis ang paglaki, o kailangang alualuhin. Kung hindi mo maintindihan ang gusto niya, subukang magpasuso.
Pagkapanganak, dapat magpasuso ang nanay sa unang oras. Makakatulong ito sa matris niya na huminto sa pagdugo at bumalik sa normal. Makakatulong ang pagdaop ng balat ng nanay at sanggol, at ang pagsupsop ng sanggol, na magsimulang dumaloy ang gatas.
Kailangan ng sanggol ang madilaw na gatas (colostrum) na lalabas sa ina sa unang 2 o 3 araw pagkapanganak. Taglay ng colostrum ang lahat ng nutrisyong kailangan ng bagong sanggol, at nagpoprotekta ito mula sa mga sakit. Nililinis din nito ang bituka ng sanggol. Hindi na kailangang magbigay ng mga halamang gamot o tsaa para gawin ito.
Para sa anumang edad na sanggol
 |
| Mas madaling magpasuso ang mga nanay na malapit matulog sa kanilang sanggol. Kung katabi niya ito sa pagtulog, puwede siyang magpasuso at matulog nang sabay. |
Magpadede sa magkabilang suso, pero patapusin muna sa isa bago ibigay ang kabila. Mas mayaman sa taba ang mas maputing gatas na lalabas tapos ng ilang minutong pagsuso kaysa sa unang labas na gatas. Kailangan ng sanggol ang taba na ito, kaya mahalagang ipatapos sa kanya ang isang suso bago ibigay ang kabila. Kusa siyang bibitaw kung handa nang tumigil o magpalit. Kung isang suso lang ang kaya niya sa bawat pagdede, simulan ang susunod sa kabilang suso.
Pasusuhin ang sanggol tuwing nagugutom siya, araw man o gabi. Maraming bagong sanggol ang sumususo nang minsan bawat 1–3 oras, laluna sa unang mga buwan. Hayaan siyang sumuso gaano man katagal o kadalas ang gusto. Mas marami siyang sinususo, mas maraming gatas ang gagawin ng katawan mo.
Hindi mo kailangang magbigay ng kanin, ibang gatas, o tubig na may asukal—kahit sa lugar na mainit ang klima. Puwedeng makabawas ito sa pagsuso ng sanggol, at makasama kung mas bata siya sa 4–6 na buwan.
Pagtulong sa sanggol na dumighay
Kapag sumusupsop ang sanggol, nakakalulon siya ng hangin, at puwedeng mabalisa siya rito. Puwede mong tulungan ang sanggol na maidighay ito. Hawakan siya na nakadikit sa iyong dibdib o balikat, at himasin sa kanyang likod. O kaya’y himasin mo ang kanyang likod habang nakaupo o nakahiga sa iyong kandungan.
Makakatulong din ang mga posisyong ito para maalo o mapaginhawa ang sanggol na dimapakali o iyak nang iyak.
Paano hawakan ang sanggol
Huwag kurutin ang utong kapag binibigay ang suso sa sanggol.
Sa pagpapasuso, importanteng hawakan ang sanggol para madali siyang makasupsop at makalunok. Dapat ding maginhawa ang posisyon ng nanay para maayos ang daloy ng kanyang gatas.
Suportahan ang ulo ng sanggol ng iyong kamay o braso. Dapat nakalinya nang tuwid ang kanyang ulo at katawan. Hintaying bumuka nang malaki ang kanyang bibig. Ilapit siya sa suso at kilitiin ng utong ang kanyang ibabang labi. Tapos ay ilagay ang sanggol sa iyong suso. Dapat malaking bahagi ng suso ang nakalapat sa kanyang bibig, at nakasubo nang husto ang utong.
 |
 |
| Sapat ang nakalapat na suso sa bibig ng sanggol. | Hindi sapat ang nakalapat na suso. |
| Dibdib sa dibdib, baba sa suso. | |
 Tuwid ang likod ng nanay.
Suportado ang ulo ng sanggol at nakalinya nang tuwid sa kanyang katawan.
Nakasupsop sa suso ang sanggol, hindi lang sa utong.
Tuwid ang katawan ng sanggol at nakapaharap sa |
 |
| Sa bagong panganak, dapat nanay. nakasapo sa puwit ng sanggol ang kamay ng nanay. | Isa pa itong mahusay na posisyon na magagamit ng lahat. Maglagay ng unan o balunbon ng tela sa ilalim ng sanggol. |
Kung nahihirapan ka sa pagpapasuso, magpatulong sa isang babaeng may karanasan. Madalas mas makakatulong siya kaysa sa ilang health worker. Huwag gumamit ng botelya. Tuturuan nito ang sanggol ng ibang klase ng pagsupsop. Ituluy-tuloy ang pagsisikap. Minsan kailangan sumubok para makahanap ka ng magandang posisyon para sa inyong dalawa, at para matutong dumede nang maayos ang sanggol.