Hesperian Health Guides

Pagpasya na magpaplano ng pamilya

Sa kabanatang ito:

babaeng nag-iisip habang may pari at manggagawang pangkalusugan o health worker na kinakausap siya sa magkabilang panig May karapatan kang gumawa ng sariling desisyon tungkol sa pagpaplano ng pamilya.

Gusto ng ilang babae ang maraming anak—laluna sa mga komunidad kung saan walang makatarungang parte ng lupa, yaman at benepisyong panlipunan ang mahihirap na tao. Tumutulong kasi ang mga bata sa trabaho at pagkalinga ng mga magulang sa kanilang pagtanda. Sa mga lugar na ito, maaaring pribilehiyo ang pagkakaroon ng kaunting anak na kaya lang ng mas mayayaman.

Maaaring gusto naman ng ibang babae na ilimita ang bilang ng anak nila. Madalas mangyari ito sa lugar na may pagkakataon ang kababaihan na mag-aral at kumita, at kaya nilang magnegosasyon sa kalalakihan sa mas pantay na paraan.

Saanman nakatira ang babae, mas lulusog siya kung kontrolado niya ang bilang ng anak, at kung kailan siya magkakaanak. Anupaman, dapat palaging hawak ng babae ang pagpapasya na gumamit—o hindi gumamit—ng pagpaplano ng pamilya.

Pakikipag-usap sa iyong asawa o kapartner tungkol sa pagpaplano ng pamilya o kontrasepsyon

Pinakamahusay kung mag-uusap kayo ng iyong asawa o kapartner tungkol sa pagpili na magplano ng pamilya at kung anong paraan ang gagamitin.

Ayaw ng ilang lalaki na gumamit ang asawa nila ng kontrasepsyon, madalas dahil wala silang gaanong alam sa paggana ng mga ito. Baka nag-aalala ang lalaki sa kalusugan ng asawa niya dahil sa mga kuwentong narinig tungkol sa panganib ng kontrasepsyon. Baka natatakot siya na kung magkontraseptibo ang babae, makikipagtalik ito sa ibang lalaki. O baka sa paningin niya, ‘tatak ng pagkalalaki’ ang maraming anak.

Subukang ibahagi ang mga impormasyong nandito sa kapartner mo. Maaaring makatulong sa kanyang maintindihan na:

  • mas kakayanin niyang alagaan at suportahan ka at ang anak ninyo kung magpaplano ng pamilya.
  • mas ligtas para sa iyo at mga anak ninyo ang pag-aagwat ng panganganak.
  • maaaring mas maging kasiya-siya ang pagtatalik ninyo, dahil walang nangangamba sa di-planadong pagbubuntis. Hindi ka mabubuyong makipagtalik sa ibang lalaki dahil may proteksyon ka laban sa di-gustong pagbubuntis.

Kung ayaw pa rin ng asawa mo na gumamit ka ng kontrasepsyon kahit alam na niya ang mga benepisyo nito, dapat magpasya ka kung gagamit ka pa rin nito. Kung itutuloy mo pa rin, baka kailangan mo ng paraang magagamit mo na hindi niya nalalaman.

Huling binago ang pahinang ito: 11 Set 2017
Ikinuha mula sa "http://fil.hesperian.org/w/index.php?title=Where_Women_Have_No_Doctor:Pagpasya_na_magpaplano_ng_pamilya&oldid=200"

QUICK LINKS


HealthWiki
Language Hub
Mobile Apps
Books
About Us
DONATE

CONNECT


Get 15% off your next order by
signing up for our newsletter. Signup and check your inbox for a coupon code and our newsletter.

Get our Weekly update

ORDERING & INFO


Buy Books
Bulk Ordering & Review Copies
Books Store FAQs
Apply for free Books
Contact Us
© Copyright - Hesperian Health Guides
| Hesperian is a tax exempt 501(c)3 organization
| Privacy Policy